ຈຸດປະສົງ:

1. ເພື່ອເສີມສ້າງທັກສະ ແລະ ຈິນຕະນາການຂອງຜູ້ເຂົ້າຮ່ວມໃຫ້ກ້ວາງຂື້ນ ໂດຍການນຳໃຊ້ກະຈົກແກ້ວມາແຕ້ມຮູບຫນ້າຂອງຕົນເອງມາແປະໃສ່ເຈ້ຍສາ
2. ເພື່ອສະທ້ອນຄວາມເປັນຕົວຕົນ ແລະ ຄວາມຮູ້ສຶກຂອງຜູ້ເຂົ້າຮ່ວມອອກມາໃຫ້ຫຼາຍທີ່ສຸດ
3. ເພື່ອໃຫ້ຜູ້ເຂົ້າຮ່ວມມີຄວາມຫມັ້ນໃຈໃນສິ່ງທີ່ຕົນເຫັນໃນຕໍ່ຫນ້າໃຫ້ມີຄວາມກ້າສະແດງອອກ

ອຸປະກອນ: ກະຈົກແກ້ວ, ສີນໍ້າ, ນໍ້າ, ຈອກຢາງ, ຜ້າແພ, ເຈ້ຍສາ

ໄລຍະເວລາ: 1 ຊົ່ວໂມງ, ຈຳນວນຜູ້ເຂົ້າຮ່ວມ: 15 – 20 ຄົນ, ອາຍຸ: 14 ປີຂື້ນໄປ

ການດຳເນີນກິດຈະກຳ:

• ຄູຝຶກອະທິບາຍຂັ້ນຕອນ ແລະ ວິທີການດຳເນີນກິດຈະກຳ
• ຢາຍອຸປະກອນໃຫ້ຜູ້ເຂົ້າຮ່ວມທຸກຄົນ
• ຂັ້ນຕອນທີ1:ຄູຝຶກແນະນຳໃຫ້ຜູ້ເຂົ້າຮ່ວມຍົກກະຈົກເງົາຂື້ນມາແຍ່ງເບິ່ງຫນ້າຕົນເອງກ່ອນເພື່ອສຳຫຼວດໃບຫນ້າຂອງຕົນວ່າຮູບຮ່າງຫນ້າຕາແນວໃດ
• ຂັ້ນຕອນທີ2:ຄູຝຶກໃຫ້ຜູ້ເຂົ້າຮ່ວມນຳກະຈົກເງົາວາງລົງແລ້ວໃຫ້ຫລັບຕາໄວ້ເບື້ອງຫນຶ່ງເພື່ອເບິ່ງຫນ້າຂອງຕົນເອງດ້ວຍຕາຂ້າງດ່ຽວ9ຈາກນັ້ນປ່ຽນມາເບິ່ງດ້ວຍຕາທັ້ງສອງຂ້າງໂດຍໃຫ້ຜູ້ເຂົ້າຮ່ວມສັງເກດວ່າວິທີໃດຈະເຫັນໃບຫນ້າໄດ້ຊັດເຈນກ່ວາກັນ (ຫລັບຕາຂ້າງດ່ຽວຈະເຫັນດີກ່ວາແລະຊັດເຈນກ່ວາ)
• ຂັ້ນຕອນທີ3:ໃຫ້ຜູ້ເຂົ້າຮ່ວມໄດ້ລົງມືປະຕິບັດແຕ້ມໂດຍການໃຊ້ສີນໍ້າແຕ້ມເວລາລະບາຍສີຄວນໃສ່ສີຫຼາຍໆໃນເມື່ອທີ່ເຮົາຈະເອົາເຈ້ຍມາທັບຮູບແຕ້ມທີ່ຢູ່ກະຈົກເງົາໃສ່ເຈ້ຍສາທີ່ກຽມໄວ້ນັ້ນ ເພື່ອບໍ່ໃຫ້ສີແຫ້ງເສຍກ່ອນ ແລະ ໃຫ້ຮູບຕິດກັບສີໄດ້ດີ

ຜົນໄດ້ຮັບຈາກການດຳເນີນກິດຈະກຳ:

ຈຸດດີ:

• ຜູ້ເຂົ້າຮ່ວມມີຄວາມຫມັ້ນໃຈໃນການແຕ້ມ ແລະ ກ້າສະແດງອອກໃນກິດຈະກຳນີ້ຫຼາຍຂື້ນ
• ຜູ້ເຂົ້າຮ່ວມໃຊ້ຈິນຕະນາການແຕ້ມຮູບແບບຫນ້າຕົນເອງໄດ້ເປັນຢ່າງດີໂດຍບໍ່ມີຄວາມເຂີນອາຍ

ຂໍ້ສັງເກດ:ຖ້າຫາກຜູ້ເຂົ້າຮ່ວມຍັງບໍ່ເຂົ້າໃຈໃນຂັ້ນຕອນໃດຫນຶ່ງຄູຝຶກຄວນອະທິບາຍແລະສາທິດໃຫ້ເບິ່ງອີກຄັ້ງຫນຶ່ງຍິ່ງເປັນການດີສຳລັບຜູ້ເຂົ້າຮ່ວມ

ຈຸດປະສົງ:

1. ເພື່ອຮຽນຮູ້ການເຮັດວຽກເປັນທີມ ແລະ ຮູ້ຈັກຮັບຜິດຊອບຫນ້າທີ່ຂອງຕົນເອງ
2. ເພື່ອໃຫ້ຮຽນຮູ້ຈັກການນຳໃຊ້ສິ່ງຂອງຕ່າງໆເຂົ້າໃນການປະດິດ
3. ເພື່ອພັດທະນາການໃຊ້ຈິນຕະນາການຂອງຕົນເອງຫຼາຍຂື້ນ

ອຸປະກອນ: ເຈ້ຍສາ (ເຈ້ຍທີ່ຜູ້ເຂົ້າຮ່ວມຜະລິດເອງ), ເຈ້ຍແຂງ, ສີນໍ້າ, ຟອຍທາສີ, ນໍ້າ, ຈານສີ, ຈອກຢາງ

ໄລຍະເວລາ: 30 ນາທີ, ຈຳນວນຜູ້ເຂົ້າຮ່ວມ: 15 – 20 ຄົນ, ອາຍຸ: 8 ປີຂື້ນໄປ

ການດຳເນີນກິດຈະກຳ:

• ຄູຝຶກອະທິບາຍຂັ້ນຕອນ ແລະ ວິທີການດຳເນີນກິດຈະກຳ
• ແຈກຢາຍອຸປະກອນ(ອຸປະກອນຕ້ອງມີການກຽມໄວ້ຮຽບຮ້ອຍແລະຄົບກັບຈຳນວນຜູ້ເຂົ້າຮ່ວມຫຼືຄົບຕາມກຸ່ມຜູ້ເຂົ້າຮ່ວມ
• ຄູຝຶກນຳສະເໜີປະຕິທິນທີ່ເຮັດສົມບູນແລ້ວ ນຳມາເປັນແບບຢ່າງໃຫ້ຜູ້ເຂົ້າຮ່ວມໄດ້ເບິ່ງ
• ຂັ້ນຕອນທີ1:ນຳເຈ້ຍແຂງທີ່ມີຂະຫນາດເທົ່າກັບເຈ້ຍສາມາທາກາວແລ້ວນຳມາຕິດໃສ່ດ້ານຫຼັງຂອງເຈ້ຍອ່ອນ
• ຂັ້ນຕອນທີ2:ຄູຝຶກແນະນຳໃຫ້ຜູ້ເຂົ້າຮ່ວມນຳເຈ້ຍທີ່ຕິດແລ້ວປະໄວ້ໃຫ້ແຫ້ງແລ້ວຈິ່ງໃຊ້ສໍແລະໄມ້ບັນທັດຂີດເປັນຕາຕະລາງປະຕິທິນຜູ້ເຂົ້າຮ່ວມແມ່ນປະດິດຕາມຈິນຕະນາການຂອງໃຜມັນ
• ຂັ້ນຕອນທ3:ຄູຝຶກໃຫ້ຜູ້ເຂົ້າຮ່ວມໃສ່ສີຕາມເທດສະການຫຼືລະດູການຂອງເດືອນນັ້ນໆຂອງໃຜມັນໂດຍໃຊ້ຈິນຕະນາການຂອງຕົນເອງເຂົ້າໃນການປະດິດປະຕິທິນຂອງຕົນເອງ

ຜົນໄດ້ຮັບຜ່ານການດຳເນີນກິດຈະກຳ:

ຈຸດດີ:

• ຜູ້ເຂົ້າຮ່ວມໄດ້ຮູ້ຈັກການປະສົມສີຫຼາກຫຼາຍວິທີ ແລະ ຈິນຕະນາການທີ່ຫຼາຍຂື້ນ
• ເຮັດໃຫ້ຜູ້ເຂົ້າຮ່ວມມີສະມາທິ ແລະ ມີຄວາມເພີດເພີນ
• ຜູ້ເຂົ້າຮ່ວມມີພັດທະນາການດ້ານການໃຊ້ຈິນຕະນາການດີຂື້ນ

ຂໍ້ສັງເກດ:ຖ້າຫາກຜູ້ເຂົ້າຮ່ວມຍັງບໍ່ເຂົ້າໃຈຄູຝຶກຄວນອະທິບາຍແລະສາທິດໃຫ້ເບິ່ງອີກຄັ້ງຫນຶ່ງຍິງເປັນການດີສຳລັບຜູ້ເຂົ້າຮ່ວມ

ຈຸດປະສົງ:

1. ເພື່ອຮຽນຮູ້ເທັກນິກການປະສົມສີໄດ້ຫຼາຍແບບຫຼາຍວີທີ
2. ເພື່ອຝຶກຝົນການນຳໃຊ້ສີໄດ້ຫຼາກຫຼາຍແບບ
3. ເພື່ອໃຫ້ຜູ້ເຂົ້າຮ່ວມມີແນວຄິດສ້າງສັນສີໃໝ່ໆຂື້ນມາດ້ວຍແນວຄິດພວກເຂົາເອງ

ອຸປະກອນ: ແມ່ສີ, ຈານສີ, ຈານສີ, ຈອກນໍ້າ, ເຈ້ຍປັ່ນ (ຫນັງສືພິມ ແລະ ເຈ້ຍຂາວ)

ໄລຍະເວລາ: 20-30 ນາທີ, ຈຳນວນຜູ້ເຂົ້າຮ່ວມ: 15ຄົນ, ອາຍຸ: 8 ປີຂື້ນໄປ

ການດຳເນີນກິດຈະກຳ:

• ຄູຝຶກອະທິບາຍຂັ້ນຕອນ ແລະ ການດຳເນີນກິດຈະກຳ
• ຢາຍອຸປະກອນໃຫ້ຜູ້ເຂົ້າຮ່ວມ ຈອກຈຳນວນ 3ຫນ່ວຍຕໍ່ຄົນ, ຈອກທີ1 ສຳລັບເຈ້ຍຂາວປັ່ນແລ້ວ, ຈອກທີ2 ສຳລັບເຈ້ຍຫນັງສືພິມປັ່ນແລ້ວ,​ ຈອກທີ3 ສຳລັບນໍ້າ,​ ແມ່ສີ ແລະ ຈານສີ
• ຄູຝຶກແນະນຳໃຫ້ຜູ້ເຂົ້າຮ່ວມສັງເກດເບິ່ງເຈ້ຍປັ່ນທັງສອງຊະນິດວ່າມີຄວາມແຕກຕ່າງກັນແນວໃດ
• ຄູຝຶກສາທິດແລະແນະນຳໃຫ້ຜູ້ເຂົ້າຮ່ວມສັງເກດເບິ່ງເຈ້ຍປັ່ນທັງສອງຊະນິດໃນຂະນະທີ່ປະສົມແມ່ສີທີ່ລົງໄປເທື່ອລະຈອກ ເຈ້ຍປັ່ນມີການປ່ຽນແປງແນວໃດ ໂດຍເຮັດແລະສັງເກດໄປພ້ອມໆກັນກັບຄູຝຶກ
• ນຳເອົາແມ່ສີຈຳນວນ 6ສີທີ່ຢູ່ໃນຈານສີມາປະສົມໃສ່ໃນແຕ່ລະຈອກ ຄົນເຂົ້າກັນໃຫ້ສີແລະເຈ້ຍປະສົມເຂົ້າກັນດີ ຫຼັງຈາກນັ້ນໃຫ້ຜູ້ເຂົ້າຮ່ວມສັງເກດເບິ່ງວ່າ ໃນສອງຈອກນັ້ນມັນມີຄວາມແຕກຕ່າງກັນຢູ່ບ່ອນໃດ? ຍ້ອນຫຍັງ?

ຜົນໄດ້ຮັບຈາກການປະຕິບັດກິດຈະກຳ:

ຈຸດດີ:

• ຜູ້ເຂົ້າຮ່ວມໄດ້ຮູ້ຈັກການປະສົມສີຫຼາກຫຼາຍວີທີ ແລະ ຮູ້ຈັກວີີທີການປະສົມສີຫຼາຍຂື້ນ
• ເຮັດໃຫ້ຜູ້ເຂົ້າຮ່ວມມີສະມາທິ ແລະ ມີຄວາມເພີດເພີນອີກດ້ວຍ

ຂໍ້ສັງເກດ:ຖ້າຫາກຜູ້ເຂົ້າຮ່ວມບໍ່ເຂົ້າໃຈຄູຝຶກສາມາດອະທິບາຍແລະສາທິດໃຫ້ເບິງອີກຄັ້ງຫນຶ່ງຍິ່ງເປັນການດີສຳລັບຜູ້ເຂົ້າຮ່ວມຫຼືໃນຂະນະທີ່ດຳເນີນກິດຈະກຳແຕ່ລະຂັ້ນຕອນຄູຝຶກຕ້ອງສັງເກດແລະແນ່ໃຈວ່າຜູ້ເຂົ້າຮ່ວມແຕ່ລະຄົນເຂົ້າໃຈດີແລ້ວບໍ ຈິ່ງຜ່ານຂັ້ນຕອນນັ້ນໆໄປ.